Bidamanna. Sa Strumpa de is pitzocheddos.

Biddamanna. Bene meda s’esibitzione

Sa Strumpa de is pitzocheddos nde pesat ogni barriera.

Sa Strumpa est una gherra (peri) de pipios. Inditat comente in sa vida non bisòngiat mai a s’arrèndere in cara a aversàrios in manera fìsica prus fortes, in generale in cara a is ostàculos pro ite su chi contat est a èssere àbiles e pretzisos. Is pipios de Biddamanna dd’ant giai imparadu e nd’ant donadu dimustratzione in is dies coladas ammustrende·si in pratza. Medas is pitzocos dae 6 a 17 annos chi ant partetzipadu e medas is persones chi si sunt ispassiadas a castiare is pipios movendosi cun làntzios, furriadas e tècnicas de bratzos e ancas subra de puntos de leva bene pretzisos, presas e sbilantzamentos: totu custu ruende in pitzu de su tapete sena s’istrupiare. Un’isport chi totus podent fàghere sena calicuna diferèntzia intre mascros e fèminas. Est adatu siat pro is pitzocos prus tìmigos e pagu seguros, ca donat aficu in is capatzidades pròpias, siat in cuddos prus bivos, ca inditat a tènnere s’agressividade pròpia suta controllu. Antonio Coccoda, 32 annos, presidente de s’assòtziu Sa Strumpa, narat bregiosu: “Sa Strumpa est un’isport cumpletu adatu a totus, chi interessat totu is mùsculos e is articulatziones, traballende subra de sa coordinatzione e subra de sa mobilidade articulare ue a traessu de s’aprendimentu de determinadas posturas su pitzocu achirit in manera graduale connoschimentu , consièntzia e controllu de su corpus. Non potzo chi èssere satisfatu de sa bona resèssida de sa manifestatzione, is pitzocos chi sunt appresiandosi a custu isport sunt semper prus”.